قصة اعلان دستور

مساء الفل شباب في خبر هام ... ضاع الاعلان الدستوري .. علي من يجده التوجه لاقرب قسم شرطة محروق يولع فيه... الاعلان الدستوري فيه سم قاتل ... علي الشعب المصري المتواجد في ميدان التحرير لا تطالبوا بالاعلان الدستوري ..الاعلان الدستوري فيه سم قاتل ...وبعد طول انتظار بيان رقم واحد... احنا في حالة اكتئاب تام.. علي الشعب ان يرحل ومش عاوزين مشاكل ...بيان رقم 2 ... انتوا لسه قاعدين  .. طيب احنا معاكم قاعدين بس والنبي مطولوش لاننا مش بنحب قاعدة الارض ....هههه معلش بقي العضمة كبرت ....عموما  روحوا انتوا وبنبعت ليكم مسجات .... موبايلات بقي  شباب ... البيان رقم 3.... حترحلوا ولا نستمر في ارسال المسجات ....البيان رقم 4 حرصا مننا علي تواجدنا في حكم البلاد وليس  حرصا علي البلاد  حنعطل الموتور ونقطع المية ومفيش شرطة ولا جيش واللي عاوز حاجة يعملها بنفسه .....بيان عسكري معرفش رقم كام هو انتوا لسه بتعدوا حنجمع دكاتره المسالك البوليه والسباكين علشان نصلح في الموتور وعليه مفيش ميه ولا صرف صحي لازم كلنا نتعاون واللي معاه شوية ميه يحوشها ....البيان رقم .. احنا كنا حنصلح الموتور لقينا فيه ماسوريتن عاوزين يتغيروا ...وبعد الكشف والفحص لقينا وصله بتسرب ميه حنلغيها ....بيان عسكري غير معلوم ...ايه يا وجيه مش عارف ترد علي الاسواني الكلام ده مينفعش روح بيتكم .. انت بقيت طري ياوجيه وشغلتنا دي مينفعش فيها الطري ... وفرجني فيلم اني راحلة...بيان عسكري الله اعلم رقمه التعديلات الموتورية اللي عملناها جامده طحن وحتخلي الديمقراطية هاي وده كله علشان نحافظ علي فلوس مبارك وشلته والناس اللي عاوزة تعمل موتور جديد ..بنقلهم بطلوا بقي ده شغلنا واحنا عارفينه ودارسينه ...تمر الايام وتطلع نتيجة الاستفتاء 77 % نتيجة طحن وثبتت العيال السيس اللي بتقول لا وفزنا بموقعة الصناديق وحنغزو امريكا الانتخابات الجاية  عن قريب حنعلم امريكا يعني ايه ديمقراطية  .. احنا عملنا انزه انتخابات من عصر الفرعون الاول لغاية الفروعون الاخير والعالم واقف مزهول ازاي عملنا الاعجاز ده في الفتره القليلة دي ده لو ابوتريكة في عصره الذهبي مش حيجيب جون كده ....حنعدل ولا نعلن ..الناس اللي قالت لا وافتكرت انها اغلبية نحب نعرفكم اننا راجعنا نفسنا وملقناش داعي نعمل تعديل  دستوري لان في الحالة دي حنمشي احه .. هو احنا عاشقينكم في الضلمة ...احنا قلنا بناء علي راي الاغلبية اللي قالو لا  حنعمل اعلان موتوري نحط فيه التعديلات وحنحبشه بشوية سلاطات .... والطحينه فري ... فين الاعلان ياعم ...اعلان ايه ..هو احنا مقلنلكوش ..اكتشفنا ان دكاترة المسالة البولية  اختلفوا مع السباكين علي بعض التوصيلت وعليه قررنا اننا نجيب نجارين يساعدوهم وربنا يسهل بس اطمنوا الاعلان موجود ولا مش موجود مش حتفرق هههههه... احنا مش عاوزين نقعد في الحكم ولا ثانية .. ومحدش مننا حيرشح نفسه... احنا ناقصين وجع دماغ .

الخط المستقيم

مساء الخير عليكم ...اول مشاركة ليا والسبب فيها صراحة نوارة نجم فالف شكر ليها ...اصل الحكاية ... ابتدت لما قريت ليها في المدونة بتاعتها مقالة عن التعديلات الدستورية وصراحة ... خلتني اصح صح .. واشغل الفهامة ... وقعدت ارد والكلمة بالكلمة .... والبادي اظلم بس  لما جيت ابعت التعليق مكنتش مشترك فبدأت اسجل ..... وبلاد تشيلني وبلاد تحطني ... ومش حخبي عليكم ... لقيت نفسي بعجن عجين الفلاحة ...بس الحمد الله وصلت للمرحلة دي ،ودي مرحلة كويسة اوي .... نحمد ربنا عليها ... الف حمد وشكر .. المرحلة دي بعد يومين بالتمام والكمال وطبعا كان في ضحايا ... الرد اللي قعدت ساعة اكتبه للاخت نوارة صراحة كله طار ... في معركة تنظيم وترتيب الصفحة عموما برده بكرر شكري ليها .

الاول قبل ما نبتدي نسن السكاكين ... ونطلع العدة ...احب اقول لكا انسان حر عايش في مصر ....متفوتش فرصة الاستفتاء روح ...قول انت عاوز ايه ...مش مهم قرارك حيكون ايه ...المهم تكون مقتنع بيه وتكون عارف ان  كلمة لا او نعم  امانة بين ايديك والموضوع مش كبير بس صعب لانها اول مرة حتاخد قرار بحرية ....حقيقي انا بحسدك يابن بلدي ..  بحسدك وانا ببكي لانك.. حتنول شرف انك تروح او استفتاء حر ...  حتقول رايك ...  حتبني بلدك... حتحس انك مصري ...  ياااااه حقيقي بحسدك ... ياريت متفوتش الفرصة واثبت للعالم كله انك مصري حقيقي ... ووطني حقيقي .

ارجع لدستورنا وححاول افتكر انا كنت كاتب ايه لنوارة ... حقيقي احنا اتشرفنا اننا مصريين بشهدائنا ... وجرحانا ..... بيكم يا نوارة انتي واسماء وزياد العليمي ووائل غنيم ...وغيركم من شباب مصر اللي حررتوها كل مصري كان جوة البلد او براها ... مش حوصف حال المصري في الغربة بس حوصف ليكي مشاعرنا واحاسيسنا .. كل واحد موصل الكمبيوتر بتاعه او موبايله علي توتير الجزيرة او العربية وبيتابع بيحصل ايه ده طبعا وهو في الشغل برجع البيت معرفش كنت باكل ولا بشرب بس قاعد قدام الجزيرة بنام تقريبا الساعة 4 الفجر لما اطمن ان الجزيرة مش حتجيب احدأث جديدة اصحي الصبح الساعة 8 اروح الشغل ويتكرر اليوم مرة تانية الموضوع ده من تاريخ 25 يناير لغاية 11 فبراير ... مش حوصفلكم قد ايه الكرامة والعزة حاسين بيها من يوم 25 يناير عموما حبيت اشكركم شباب مصر اخواتي

ارجع بقي للتعديلات الدستورية ... حنقول او حتقولوا نعم او لا ... سمعت امبارح راي د/ يحيي الجمل وحقيقي لما سمعته افتكرت جدي رحمه الله عليه وهو بيقول تمشي مضرش .. هو رايه انها تمشي ومضرش ... ولما جدي كان بيقول كده كان قصده .. مفيش داعي نتخانق هي غلط بس تمشي... انا لغاية دلوقتي مش فاهم ليه علشان نعمل دستور جديد نعدل القديم وبعدين نلغيه ... ليه احنا دايما بنضيع وقت طويل اوي ... الطريق مفتوح لنقلة تاريحية في تاريخ مصر ... ليه نضيع اعظم حدث عملناه ... ونضيع وقت حنندم عليه ...تفتكروا لو كان طلع المشير طنطاوي يوم 12 فبراير وقال الغاء البرلمان والدستور وتشكيل حكومة وطنية جديدة .... وقعد اسبوع يشكل فيها زي ما هو عاوز خلوها اسبوعين .... وشكل لجنة دستورية من مسلمين ومسيحين وقانونين واقتصاديين 50 واحد واشتغلوا علي الدستور .... كنا وفرنا وقت قد ايه ... نجيي للف والدوران في التعديلات لازم المرشح يكون من ابوين مصريين وجدود مصريين اوك ولا يحمل جواز سفر اخر .. غريبة ... ولا يكون متزوج من غير مصري .. اغرب .. علي فكرة انا والله معييش جنسية ثانية ومراتي مصرية ...لكن مش منطقي التوصيف ... وسمعت مرة الدكتور البشري بيفسر دي علشان جمال مبارك معاه جواز سفر بريطاني ... اوك حنعديها ... وعلي رأي د/ يحيي تمشي وماله بس السؤال المهم ....امتي حنعمل قانون او دستور او عقد او اي شئ بدون لف ودوران ليه حنفضل نعقد في الامور ...ونضيع الوقت في الكلام والنقاش اللي ملوش لازمة .... اسوأ شئ من الحالة الجدلية دي هو الشعور بعدم الثقة ... والتخوين ... نظرية المؤامرة ... صدقوني لو عاوزين نمشي صح نحط ايدينا في ايدين بعض ونعاهد نفسنا وربنا اننا نبني بلدنا ... وافضل الطرق هو الطريق المستقيم ...حتلقوه سهل وبسيط ... وحيوفر علينا سنين عذاب ... وبعد شوية يجي ناس تقول اصل احنا نقول لا... او ناس تقول انتوا مسمعتوش كلامنا كنتوا قولوا نعم .... بنفترق علي امور بسيطة والسبب ان اللي في ايده السلطة متردد ... خايف ... ليه يا مجلس يا عسكري خايفين ... انتوا معاكم شعب يصنع المعجزات والله ... احنا المصريين لما رفعنا راسنا فوق لقينا كل اللي حوالينا صغيرين اوي .... ارجوكم متخافوش

كما ليا امنية ...ادونا فرصة نكون مصريين زيكم ... والله احنا مصريين ... خلونا نشارك في بنا بلدنا ...  قلولنا الطريقة واحنا معاكم .